خاطرة سعيدة

اعتبر حياتى كلها نعمة متخفية أو كالتعبير الانجليزى A blessing in disguise
دائما تأخذنى الحياة لأماكن أو تضع اشخاص فى طريقى .. احسهم فى البداية شئ مكروه او على غير ما كنت اتمنى

ولكن تثبت لى الأيام انهم من بهم استطعت المرور من الازمات والاوقات الصعبة .. الحمدلله رب العالمين

- مثلا لما كنت فى الجامعة رزقنى ربى بمقابلة فتاة .. ظننت فى البداية انها لا تهتم بى بل فقط يهمها الدراسة والعلم وتتقرب لى من أجل ذلك ، ولكن اثبتت لى الأيام والمواقف انها لا تهتم بشئ مثلما تهتم بى .. فهى تحبنى من قلبها ولا تريد لى غير الخير كله.
- وفى الجامعة برده قابلت اجدع 3 بنات عرفتهم فى حياتى .. كان الالتزام الدينى جزء مهم بعتمد عليه فى اختيارى وكانوا هما مش من اللى بيصفوا بهذا الوصف .. ولكن لما عرفتهم اكتشفت ان فيهم خير اكبر من ناس كتير بيصفوا بالملتزمين.

- فى الجامعة برده كانت دايما بتروح معايا واحدة بحكم سكننا المتقارب ، فى الأول كنت اظنها سطحية لا تريد غير اللهو .. لكن الآن معتقدش انى كنت هاقدر اروح وآجى من الجامعة لو هى مكانتش فى حياتى .. بجد بحبها اوى.
- بعد الجامعة لم استطع العمل فى المكان اللى طالما سعيت له .. لكن سبحان الله بعد ما شفت الموضوع من الخارج حسيت انه نقمة على اصحابه .. وانه عذاب متخفى .. ربنا يعين كل من اضطر يدخله.

- حتى فى عملى البسيط الذى لا استطيع ان ارضى عنه حتى الآن .. رزقنى الله بمجموعة من الزميلات الرائعات .. من غيرهم كان ممكن اغلط كتير واسيب الشغل من أول اسبوع.

نفسى بجد نقدر الحاجات الصغيرة اللى فى حياتنا ونقدر أكتر الحاجات اللى نظنها سيئة وبتحصل لنا .. لأنها لو مكانتش حصلت مكناش هانوصل للشئ الجيد اللى بعدها :)

الحمدلله ملئ السماوات وملئ الأرض وملئ ما بينهما وملئ ما شئت من شئ بعد