ليه الناس بتخاف منه؟ .. ليه ذكره هو معناه العبوس والزعل والبكاء فى كتير من الأوقات؟ .. اتعلمت النهاردة حاجات كتيير مكنتش اعرفها عنه .. وحبيت اشاركها معاكوا ..
تخيل معايا المخلوقات كلها كأنها راكبة سفينة واحدة كبير والسفينة دى ماشية فى بحر لا نهاية له وهى بتمر بمراحل معينة منها الميلاد وبعدين مرحلة الدنيا ثم الموت وبعدين مرحلة القبر ثم البعث وبعدين مرحلة الحساب وبعدها خلاص .. فعلا خلاص محدش هايكلمك تانى سواء فى جنة او فى نار :)
طب بالذمة دى مش حاجة حلوة .. D:
طيب بما ان الموت مجرد مرحلة انتقالية ليه بقى خايفين منه اوى كدا .. تخيل برده معايا لو ان حد قالك انك هاتسافر مكان بعييد وغريب عليك لأول مرة فى حياتك ، مش هاتخاف؟ حتى لو متشوق وعاجبك المكان برده فى رهبة من المجهول دايما .. خصوصا ولو كان المجهول دا محدش قبل كدا رجع حكى عنه اى حاجة :)
طيب برده لو هو مجرد سفر محدش بيرجع منه ليه بنخاف ؟ نيجى بقى لاهم حاجة وهى الخوف من ان الرحلة متبقاش ظريفة .. بمعنى تانى نكون اخطانا كتير فى حياتنا لدرجة اننا عارفين ومتأكدين اننا مش هانرتاح فى الرحلة وهنا يكمن الرهبة الحقيقية للموت وما بعده
طيب عمرك فكرت انك لو احسنت التصرف فى الوقت الحالى ممكن تستمتع بتجربة الموت اكتر من اى رحلة عملتها فى حياتك .. جربت تفكر ان طالما الموضوع مش معمم على كل خلق الله فى الصالح وفى اللى مش .. يعنى اكيد العواقب كمان مش واحدة
انا عرفت ان للناس المؤمنة بتبقى الحكاية سهلة خالص .. اولا ملك الموت بيبقى رحيم جدا عليهم (ربنا يجعلنا منهم) .. وبعدين القبر بيبقى قطعة من الجنة وبيلاقوا عملهم الصالح متجسد لهم فى صورة واحد شكله جميل ولبسه جميل وبيفهمهم يعملوا ايه فى اللى جاى وبيساعدهم (ربنا يجعلنا منهم)
خلينا نبقى مفاوضين زى ما مصطفى حسنى بيقول .. ونقول زى ما رسولنا كان بيقول : "اللهم أحيني ما دامت الحياة خيرا لي ، وتوفني إذا كانت الوفاة خيرا لي" .. توكل على الله وثق فى عملك الصالح وكمان زوده .. عشان تستمتع بالرحلة الجميلة دى
طيب .. خلاص انا قررت اعيد حساباتى وابقى متشوقة للموت واعمل على كدا لانى ظنى فى ربى انه هايساعدنى على كدا ..
ها بقى انت قررت ايه؟
No comments:
Post a Comment