النهاردة يوم مش عادى .. ومش هايتكرر تانى حتى لو جت انتخابات تانية .. لأن دايما اول مرة متتعوضش.
كان يومى غريب اوى .. نفسى احكيه لكل الناس وبالتفصيل .. لكن الاحداث معانا كلنا فى اليوم دا كانت غريبة علينا .. وكالعادة الصور هاتبقى كتييير والكتابة والتأريخ مش هايبطل ..
الشئ اللى مقدرتش اصدقه فى البداية منظر الطابور .. ازاى كان متحضر وازاى كان يعبر عن ثورة فكر حصلت لينا كلنا كمصريين ..
انا شفت طابور طوله حوالى ميت متر مستنيين يدخلوا اللجنة عشان يصوتوا ..
شفت ست عجوزة ماشية على عكاز داخلة اللجنة عشان تصوت ..
شفت راجل بيعدى ست ادامه عشان مترجعش بابنها الصغير من اول الطابور ..
شفت عجائب كنت عارفة انها موجودة فى اهل مصر طول عمرى بس متخيلتش انها تطلع ابدا لبره .. : )
شفت رقى وشفت نزاهة وشفت فرحة بالحرية وشفت .. شفت مصريين بجد.
كنت بفكر اكلم الناس واقنعهم امام اللجنة برأيي فى التعديلات .. لكن بعد اللى شفته معدش فى كلام يتقال .. الناس دى جاية عشان هدف .. ومفيش قوة فى الدنيا دى هتخليهم يتخلوا عن الهدف دا .. الهدف هو الحرية وبس .. عشانه وقفوا فى الطابور الطوييييييل دا تحت الشمس وبابتسامة على وجوههم.
ممكن كلامى يبقى فيه حبتين مبالغة على حبة سذاجة .. لكن انا لما طلعت من اللجنة بعد ما اديت صوتى حسيت ان الهوا اتغير معرفش ليه .. يمكن عشان اول مرة اعمل ومش بس اتكلم فى السياسة .. مش عارفة : )
وفى النهاية لا نملك الا الدعاء الى الله باكثار افراح مصر واكثار من حبرها الفسفورى حتى تتلغوص به اصابعنا كتيير فى الأيام القادمة.
No comments:
Post a Comment